1. julija 1990 je so tež w žiwjenju Serbow tójšto změniło, wšako běchu woni tohorunja wot hospodarskeje a měnoweje unije potrjecheni. We wukładnych woknach wobchodow ležachu nadobo zapadne wudźěłki. Wo NDRske produkty hižo nichtó njerodźeše.
Nowa doba je tehdy dosć wobšěrnje wo wonej historiskej změnje w žiwjenju ludźi rozprawjała, tež do toho. Tak pisaše 21. junija 1990, zo je sej Budyska měšćanska Domowinska skupina 36 z konjacym zapřahom wulećała. Při tym njezataji, zo měješe zarjadowanje cyle praktiski zmysł: Domowinjenjo chcychu pjenjezy w kasy přetrjebać, „zo njebychu spadnyli“. Po 1. juliju nowiny z wjacorymi přinoškami wo nowym času informowachu. Tak přewodźachu 83lětnu Madlenu Bjaršowu a 81lětnu Marju Šołćinu při prěnim nakupowanju z D-hriwnami w Pančicach-Kukowje.
Chěžu twarjacy roboter je awstralske předewzaće wuwiło. Po informacijach firmy z města Perth trjeba mašina z mjenom „Hadrian“ runje dwaj dnjej, zo by wonkowne murje domu stajiła. Z 28 metrow dołhej teleskopowej ruku móže tysac cyhelow wob hodźinu kłasć. Dźěło wotběži dospołnje awtomatisce. W běhu lěta chcedźa 150 domow z roboterom natwarić. Firma hižo dźesać lět na swojim rewolucionarnym nastroju dźěła.
Na awtodróze běhaca kóčka je šoferku na A4 w Durinskej k přewšo zwažliwej pomocnej akciji pohnuła. Po informacijach policije žona na nabóčnej čarje zasta a spyta najebać wulki wobchad wustróžane zwěrjo popadnyć, kotrež bě sej na srjedźne wobhrodźenje awtodróhi wućeknyło. Při tym žona jězdnju dwójce přeprěči. Skónčnje pak wołaše policiju wo pomoc, a wona kóčku popadny.
Dalšu bombu našli
Choćebuz (dpa/SN/ch). Twarscy dźěłaćerjo su wčera w nutřkownym měsće Choćebuza dalšu bombu ze swětoweje wójny našli. „Bomba njeměješe zapalak“, praji rěčnik. Alarm njebu tuž wuwołany. Połsta kilogramow ćežku bombu wčera dopołdnja wottransportowachu. Hižo dźeń do toho běchu twarscy dźěłaćerjo na samsnym městnje pjećstow kilogramow ćežku bombu našli. Dokelž njebě najprjedy jasne, kaž ma bomba zapalak, dyrbjachu tysacy Choćebužanow swoje bydlenja wopušćić. Tež Serbski dom su ewakuowali.
Wuspěšne tarifowe jednanja
Drježdźany (SN/JaW). Brunica a aktualne wuwiće we Łužicy běštej hłownej temje wčerawšeho posedźenja Rady za serbske naležnosće Sakskeje w Drježdźanach. Předsyda Domowiny a zdobom čłon sakskeje serbskeje rady Dawid Statnik w tym zwisku zwěsći, zo je tuchwilne połoženje předewšěm za potrjechenych chětro ćežki a njepřijomny čas. Serbska rada ma tuž namjetowane załoženje tak mjenowaneho Łužiskeho fondsa, kotryž měli wutworić krajni a zwjazkowi politikarjo, za zmysłapołne.
Brüssel (dpa/SN/K). Posledni dźeń za Grjeksku pod wuchownym krywom. W nocy na srjedu so mjezynarodny pomocny program kónči. Jedyn ze sćěhow je, zo njemóže Grjekska IWF k terminej 1,54 miliardow eurow wróćić. Kaž premier Alexis Tsipras w telewiziji rjekny, knježerstwo ratu njepřepokaza, chibazo dóńdźe hišće w poslednim wokomiku k spokojacemu dojednanju z mjezynarodnymi pjenjezydawarjemi.
Krótko do ultimatuma su němscy Zeleni eurokraje a Athenske knježerstwo namołwili, sydnyć so za jednanske blido. Kanclerka Angela Merkel (CDU) přilubi, njezawrěć so dalšim jednanjam, by-li Athen po referendumje wo nje prosył. „Chce-li něchtó z nami rěčeć, smy k tomu kóždy čas zwólniwi“, Merkel w grjekskej telewiziji zwurazni, „woprašowanje luda ma zaměr, pokročować z jednanjemi.“ Dźiwajo na hrožacy statny bankrot spyta Europa Grjekow motiwować za paket pjenjezydawarjow nastupajo reformy a lutowanje. „Kóžde ,ně‘ w referendumje je ,ně‘ napřećo Europje“, rjekny šef komisije EU Jean-Claude Juncker.