Něhdźe 70 000 ministrantow ze wšeho swěta přebywaše wot 30. julija do dźensnišeho w Romje. Tež serbscy ministranća běchu so minjenu njedźelu na puć do wěčneho města podali. Wjeršk bě wutorna awdienca z bamžom Franciskusom. Kamerateam Wuhladka je serbsku skupinu přewodźał a bě wězo tež při awdiency ze swjatym wótcom na městnje, tak chcedźa w jutřišim wusyłanju wo dožiwjenjach młodych křesćanow rozprawjeć.
Wěnować budu so serbscy telewizijnicy w sobotnym wudaću, kotrež započnje so w 11.45 hodź. na MDR, tež podawkej před 50 lětami w Čěskej, kotryž je do stawiznow jako „Praske nalěćo“ zašoł. Wuhladko wobswětla podeńdźenja lěta 1968 wokoło Alexandera Dubčeka a jeho reformowych myslow kaž tež wokoło wojerskeho zasaha jednotkow statow Waršawskeho pakta w tehdyšej Čěskosłowakskej. Wospjetowanje budźe póndźelu, 6. awgusta, w 6.40 hodź. na MDR a sobotu, 11. awgusta, w 13.30 hodź. w telewiziji RBB. SN
Budyšin (SN). Jako prěni Serb bu kapłan Alojs Andricki swjatki póndźelu lěta 2011 w Drježdźanach zbóžnoprajeny. Nětko, nimale wosom lět pozdźišo, so mjez katolskimi Serbami horco diskutuje, na kotre wašnje móhł so Andricki tež widźomnje česćować. Hač w formje pomnika abo wopomnjenskeje tafle? Hač w Róžeńće abo tola w Radworju? Mjeztym předleža prěnje naćiski a ideje – ale runje tak su tež napřećiwne hłosy. Wo tym rozprawjeja jutře, 5. meje, we Wuhladku, kotrež so w 11.45 hodź. w telewizijnym sćelaku MDR wusyła. Dalša tema magacina je wubědźowanje młodych hudźbnych talentow w SLA.
Kulinariska chłóšćenka
Budyšin (SN). Produkcija awstriskeho rozhłosa ORF „Słód Europy“ zaběra so z kulinariskimi kulturami kontinenta. Tule sobotu w 15 hodź. a dalši króć wutoru, 8. meje, w 11.40 hodź. wusyłaja na sćelaku 3sat z rjada film „Łužica“. Awtor Lojze Wieser pućuje po stopach Theodora Fontaneho po Łužicy. Mjez druhim je slědźił za złotom hadźaceho krala, hojenskej funkciju kórkowych bělizkow a za potajnstwom serbskeje kwasneje jědźe.
Choćebuz (SN). Moderator delnjoserbskeho telewizijneho magacina Łužyca Christian Matthée poby w Žylowskej Witaj-pěstowarni „Mato Rizo“, hdźež su před 20 lětami započeli prěnje dźěći po modelu Witaj kubłać. We wusyłanju magacina jutře, 17. měrca, w 13.05 hodź. wo tym a wo swjedźenskim zarjadowanju w telewiziji RBB rozprawjeja.
W dalšimaj přinoškomaj Łužycy zhonja přihladowarjo wo wopyće delegacije Europskeho parlamenta w Delnjej Łužicy a wo wopyće pola Měta Pernaka w Berlinje, kiž swjeći jutře 80ćiny.
Budyšin (SN). Wopřijeće Witaj steji minjene dwaceći lět w Serbach za modelowy projekt. Ideju je Jan Bart z Francoskeje do Łužicy přenjesł. Bretonojo běchu model z wuspěchom praktikowali, a tak jón mjeztym tež w serbskim žiwjenju nałožujemy. Nětčiše 20lětne wobstaće modela Witaj bě nastork telewizijnemu magacinej Wuhladko, sej to docpěte jutře, 3. měrca, w 11.45 hodź. na sćelaku MDR raz bliže wobhladać.
Dalša tema wusyłanja je „70 lět Serbski zakoń.“ Tež dźensa poćahuje so tón we wulkich dźělach na tekst z lěta 1948. Je pak zakoń hišće načasny abo ma so nowelěrować a wudospołnić?