Serbske Pazlicy lětuši dobyćer swjatkowneje kopańcy
Swjatki póndźelu powita młode předsydstwo sportoweho towarstwa Pěskecy wosom mustwow w stadionje „K dźiwjemu swinjeću“ na hižo tradicionalny koparski turněr wjesnych mustwow. Kaž kóžde lěto wojowachu cyłki z Noweje Wjeski, Worklec, Njebjelčic, Serbskich Pazlic, delnich Sulšec, Smjerdźaceje, Róžanta a Pěskec wo požadany pokal. Do turněra mějachu nimale wšitke mustwa ćeže, dosć koparjow namakać. Tohodla hrajachu tež lětsa zaso w někotrych teamach „cuzy hrajerjo“ sobu. Po wulosowanju dweju staflow wuhrachu kóždy duel dwójce 10 minutow.