Njeswačanow mócnje poskubali

póndźela, 19. měrca 2018
artikl hódnoćić
(0 )
We wobwodnej blidotenisowej klasy bě prěnje mustwo DJK Kulow/Hózk pola poslednjeho tabulki SV Gelenau III jasny faworit. Dokelž pak Pětr Měškank (0) a Křesćan Domaška (0,5) scyła w normalnej formje njeběštaj, dyrbjachu ći tamni horco wojować, zo bychu na kóncu z 9:7 snadnje dobyli. Křesćan Měškank (3), Matijas Bart (2) a Michał Měškank (2) pokazachu prima wukon. Tež Jens-Pětr Meier (1,5) měješe swój podźěl na snadnym dobyću. W prěnjej wokrjesnej lize wočakowachu přiwisnicy na Konječanskej wjesnej žurli duel mjez druhim tabulki z Njeswačidła a třećim DJK Konjecy. Wobě mustwje njemóžeštej pak z najsylnišej zestawu nastupić. Pola hosći wupadny načolny hrajer Rainer Schilling, w rjadach domjacych dyrbjachu Pětra Bejmu a Michała Elstnera narunać. Wočakowana napjatosć pak njenasta, dokelž zahrachu so delanscy blidotenisća do wuběrneje formy. Njemějachu w swojich rjadach žadyn wupad, tak zo zdeklasowachu hosći z 13:2. Maćij Kokla, Alojs Čóška, André Čórlich a Dietmar Hrjehor – wšitcy z 2,5 dypkami – běchu njepřewinjomni. Jeničkaj dypkaj wotedaštaj Dierk Šewc a Frank Woko.
wozjewjene w: Sport
Prošu přizjewće so, chceće-li komentar podać

Serbska debata

nowostki LND