Domjacu hru zasłužbnje dobyli

wutora, 01. oktobera 2019
artikl hódnoćić
(0 )

ST Marijina hwězda

– SG Großnaundorf 3:0 (2:0)

Zestawa domjacych: Hejduška – R. Cyž, Zelnak, Rab, Ch. Cyž, Pjetaš (80. Wróbl), Jurš, Hawš, Schmidt (75. Melnyk), Šołta, Pakoßnick (60. Eldor)

Koparjo ST Marijineje hwězdy witachu na sedmym hrajnym dnju wokrjesneje wy­šeje ligi přećiwnika z Großnaundorfa a dobychu jasnje z 3:0. Po dołhim času měješe trenar Erwin Kleinmann nimale kompletny kader k dispoziciji. Tak su hosći­ćeljo wot wšeho spočatka partiju posta­jeli. Hižo w 10. min. móžachu domjacy přihladowarjo prěni raz wyskać. Kapitan Jakob Pakoßnick wudo­by sej energisce w šěsnatce hosći kulowatu kožu a suny ju z kónčkojteho kuta nisko do wrotow. Po wurjadnym pasu Tomaša Jurša w 17. min. smaleše Pakoßnick samlutki na wrotarja, jemu pak so njepora­dźi bul we wrotach zaměstnić. Jeno tři mjeńšiny pozdźišo měješe domjacy cyłk dalšu wulku składnosć. Flanku Paula Schmidta z lěweho boka pak Dawid Šołta ze šěsć metrow snadnje nimo­ zhłójč­­ko­wa. Hosćo běchu w tej fazy­ jeničce ze standardami strašni, tak na přikład we 28. min. po wólnym kopje. Fabian Hejduška pak steješe prawje a třěleny róžk znješkódni. W 37. min. mó­žachu Pančičenjo druhi króć juskać. Znowa bě Jurš wuběrnu přihrawku na Šołtu hrał. Konječan trjechi ze zdalenosće 14 metrow. Zbožo mějachu klóšterscy koparjo krótko do přestawki, jako Ronald Cyž situa­ciju na wrotowej liniji wujasni.

Hižo prěnja akcija domjacych w druhim połčasu wjedźeše k 3:0. Krótko wuwjedźeny róžk sflankowa Feliks Pjetaš do centruma. Tam podlěši Pakoßnick hrajny nastroj z hłowu na Šołtu, kiž direktnje a njeortodoksnje z pjeć metrow na 3:0 zwyši (56.). Hladajo na komfortabelny před­skok domjacy spěšnosć trochu spomalichu, a hosćo mějachu kusk wjace podźělow na partiji. W 62. min. mó­žeše so Hejduška we wrotach hnydom dwójce wuznamjenić. Najprjedy wón ze sylnej paradu wótru třělwu z 22 metrow znješkódni, na to stłóči slědowacy pospyt z porstami wyše łaty. Koparjo Marijineje hwězdy nječinjachu w poslednjej poł hodźinje wjace, hač bě trjeba. Wušiknje zběhnjeny bul Alija Eldora do běha Šołty, kotryž bul z hrudźu přiwza a wrotarja wuhra, by nimale k 4:0 wjedł. (85.). Třělwa na klětku pak bu w poslednim wokomiku blokowana. Tobias Nowak

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND