Dalši króć podleželi

póndźela, 04. nowembera 2019
artikl hódnoćić
(0 )

HZ Łaz/Běły Chołmc

– ST 1922 Radwor 1:0 (1:0)

Zestawa hosći: Grenzemann – Reineke (46. Buša), Kral, Měrćink, Wjacławk, Nuk, Glücklich, Zähr, Pječak (81. A. Schulze), Rachela, T. Schulze

Po tym zo bě 1. koparske mustwo ST Radworja Malešecam, Marijinej hwězdźe a rezerwje Chróšćanskeje SJ podle­žało, dojědźechu sej chowancy trenarja Andija Schultza do Łaza. Tam čakaše jedne z najsylnišich cyłkow wokrjesneje ligi na nich.

Personelnje dale słabje wobsadźeni ho­sćo stajichu sej cil, so znajmjeńša z dypkom nawróćić. W prěnich mjeń­šinach pak pokazachu zaso zwučeny wo­braz­ minjenych hrow. Dwaceći mjeńšin měje­še jich hosćićel w horšći a wuhra sej dobre móžnosće. W 15. min. zhubichu w srjedźnym polu bul, a z dalokej třělwu přelesćichu domjacy jich škit. Nad­běho­war suny bul ze zakładneje linije před wrota, hdźež Phillip Witschas k 1:0 přetwori. Po tym pak wustupowachu Ra­dworčenjo zaso prezentnišo a nadźěłachu sej dobre móžnosće. Najlěpšu měješe Tom Schulze w 20. min., jako bu wot Lukaša Pječaka z lěweje strony posłu­ženy. Schulze pak wrota z niskej třělwu wo centimetry misny. W 32. min. wrotar hosći Peter Grenzemann wuběrnje reagowaše, jako dźeržeše dobry kop nad­bě­howarja z centralneje pozicije.

W 2. połčasu zasadźi trenar Schultz nazhoniteho Nica Bušu, zo by tón nowe akcenty sadźił. Hosćo dyrbjachu nětko wjac riskěrować, štož wězo tež k tomu wjedźeše, zo móžeše Łaz/Běły Chołmc na kon­tery łakać. Tute pak domjacy efektiw­nje wužić njemóžachu. Najlěpšu móžnosć­ w druhim połčasu mějachu hosćo­, jako Johannes Wjacławk přez dobru přihrawku Toma Schulzy sam před wrotarjom steješe. Wjacławk rozsudźi so za krót­ki kut a trjechi jenož łatu. Tak su so tež z Łaza bjez dypka nawróćili.

Napadne mjeztym je, zo zestupnik z wyšeje wokrjesneje ligi ST Radwor přenjekoncentrowanje a pasiwnje wustu­puje. Hrajerjo steja krok předaloko wot pře­ćiwnika preč a su stajnje sekundu přepomali. Poprawom mějachu Radworscy koparjo jako zestupnik narok wo prědnje městna sobu hrać, mjeztym pak je wotstawk k čołu tabulki hižo na jěd­naće dypkow rozrostł. Daniel Nuk

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND