Sćěhi za ratarjow a wobydlerjow

póndźela, 14. septembera 2020
artikl hódnoćić
(0 )

Swinjaca mrětwa móhła so tež w Hornjej Łužicy wupřestrěć

Guben/Budyšin (SN/BŠe). Poprawom zdaše so afriska swinjaca mrětwa hišće daloko preč być. Z minjeny tydźeń wozjewjenym padom namakaneho mortweho dźiwjeho swinjeća w braniborskim wo­krjesu Sprjewja-Nysa je so wšitko změniło. Wosebje ratarske zawody so najnowšeho wuwića dla chětro starosća.

Kaž zwjazkowa ratarska ministerka Julia Klöckner (CDU) minjeny štwórtk zdźěli, jedna so wo prěnje swinjo, kotrež je w Němskej na mrětwu zahinyło. Našli běchu mortwe skoćo na wotžnjatym polu něhdźe 50 kilometrow wot sakskeje mjezy sewjernje Gubina. Kadawer bě hižo chětro přetłaty. Braniborski krizowy stab je hnydomne naprawy zahajił. Tak připrawichu tři do štyri kilometry wokoło namakanišća elektriski płót. Fachowcy nětko w kónčinje intensiwnje za dalšimi padami slědźa, zo bychu infekcisku přestrjeń dokładnje zwěsćili.

Něhdźe sydom kilometrow wot namakanišća zdalenej stej dwaj zawodaj, hdźež domjace swinje plahuja a kotrejž chcedźa nuznje škitać. Na žadyn pad njesmědźa so domjace swinje w zawodomaj z wirusom natyknyć. Hewak dyrbjeli tam wšitke skoćata zarězać, štož by za zawodaj hobersku hospodarsku katastrofu wo­znamjenjało. Hońtwy w potrjechenych kónčinach su zakazane. Nimo toho njesmědźa ratarjo swoje pola nachwilnje wobhospodarjeć, dokelž dyrbja wobchad jězdźidłow pomjeńšić.

Sakski burski zwjazk ratarjow namołwja so škitać, dokelž je strach swinjaceje mrětwy nětko w Sakskej jara wulki. Zawody měli přepruwować, hač su za tajke pady wotpowědnje zawěsćene. Dale měli přepruwować, hač móhli žně zašo zahajić hač předwidźane. „We wobhrodźenych kónčinach njesmědźa na přikład žanu kukuricu žnjeć“, informuje předsyda burskeho zwjazka Budyšin-Kamjenc Stefan Triebs. Zaměr je, zo so snano natyknjene swinje njenastróža a njerozćěkaja. Předsyda zwjazka tež na to skedźbnja, zo tuchwilu mnoho ludźi w lěsach hriby zběra a tam pućuje. Jědźne wotpadki do lěsow njesłušeja a su wulke riziko. Mjasowe produkty so jara dołho dźerža a móhli wirus we sebi měć. Ludźo na njón njeschorja, za swinje pak móže infekcija smjertny wusud być.

Po Južnej Koreji stej mjeztym tež Japanska a China na pad swinjaceje mrětwy reagowałoj a zakazałoj němske swinjace mjaso importować. Cyłkownje 17 procentow mjasa Němska hewak do Chiny dowožuje.

wozjewjene w: Hospodarstwo
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND