Cyłkownje 20 zakładnych šulow z Budyskeho wokrjesa je so minjeny štwórtk na koparskim turněrje w Budyšinje wobdźě­liło. Při najrjeńšim nazymskim wjedrje wojowachu šulske cyłki wo swětowe mišterstwo zakładnych šulow. Zhromadnje z wokrjesnym sportowym zwjazkom a Zapadołužiskim koparskim zwjazkom (WFV) běše tydźenik Wochenkurier hłowny wuhotowar a iniciator tutoho koparskeho wubědźowanja. Mustwa přijědźechu mjez druhim z Wojerec, Wóslinka, Rakec, Radeberga a Kamjenca. Tež šulske mustwa z Radworja, Kulowa a Worklec na Młynkec łuce za bulom honjachu. W předpolu turněra bě so kóždej šuli jedyn kraj přilosował. Tak nastupi Serbska zakładna šula „dr. Marja Grólmusec“ Radwor za Japansku, Krabatowa zakładna šula Kulow wojowaše za Portugalsku a Serbska zakładna šula „Michał Hórnik“ Worklecy nastupi w skupinje A za Uruguay. W štyrjoch staflach so dypkownje w 9.30 hodź. předkoło zahwizda. Po modusu „kóždy přećiwo kóždemu“ wojowachu šulerjo w zestawje pjeć hrajerjow a jedyn wrotar na štyrjoch hrajnišćach wo dypki.