Na druhim domjacym hrajnym dnju w Sakskej klasy běštej mustwje do Worklec přijěłoj, kotrejž steještej w tabulce cyle blisko w susodstwje Worklečanow. Kóždy přiwisnik wolejbula wě, zo dypki z tajkich partijow dwójce liča. Su to tak mjenowane wulke dypki. Cil domjacych běše, snano štyri do šěsć dypkow na swójske konto składować. Z toho pak ničo njebu.
Viktoria Worklecy – ST Coswig-Mišno 0:3 (15:25, 21:25, 26:28)
Hnydom prěnja sadźba přećiwo hosćom z Łobjoweho kraja so nimokuli. Jenož prěnich šěsć ličakow běše wurunanych, potom so hosćo wotsadźichu. Přičina za to bě wosebje, zo steješe Worklečanam jara wurunany, zahraty cyłk napřećo, kiž pokaza sylne nadaća, skoro bjez někotrehožkuli zmylka. Přiwzaća domjacych běchu hustodosć njeprecizne a z toho rezultowaše pobrachowacy ćišć w nadběhu. Spěšnje steješe 12:19 a dalše dypki za Mišno běchu lochke. 15:25 rěkaše strózby rezultat.
