Napjata hra na taktisce wysokim niwowje

póndźela, 28. nowembera 2022
artikl hódnoćić
(0 )
Wrotar němskeje koparskeje wubranki Manuel Neuer je wčera ze sylnej paradu swoje mustwo před zažnym zastatkom wuchował. Při přećiwniskich wrotach pak bě wón bjez šansy wotwobaranja. Foto: pa/Matthew Childs Wrotar němskeje koparskeje wubranki Manuel Neuer je wčera ze sylnej paradu swoje mustwo před zažnym zastatkom wuchował. Při přećiwniskich wrotach pak bě wón bjez šansy wotwobaranja. Foto: pa/Matthew Childs

Na swětowych koparskich mišterstwach: Španiska – Němska 1:1 (0:0)

Němska je sebi po stopnjowanju a sylnej hrě přećiwo Španiskej dale móžnosć zaćaha do wosmifinala swětowych koparskich mišterstwow wobchowała. Po poražce 1:2 přećiwo Japanskej w prěnjej skupinskej hrě je tójšto němskich přiwisnikow a ekspertow mustwo trenarja Hansija Flicka hižo wotpisało. Falowaca mentalita, njedostatki w škitnym pasmje, pobrachowaca koncentracija a indiwiduelne zmylki, wšitko to wumjetowachu němskim hrajerjam po zazběhu do turněra. Bohužel je nalada němskeho fana, přiwisnika, jara wot wuslědka wotwisna. We wokomiku dobyća abo triumfa so wšitcy raduja. Hdyž pak raz njeběži, so cyły kraj hórši a statusy w socialnych medijach so ze skřiwdźenjemi kopja. Škoda, haj samo zrudne je zdźěla tute wuwiće. Narodne mustwo pak wčera dopokaza, zo móže z faworitami kaž Španiskej hrajersce sobu dźeržeć. Přez dobyće 1:0 Costa-Ricačanow přećiwo Japanskej je w skupinje E dale wšitko wotewrjene.

wozjewjene w: Sport
Prošu přizjewće so, chceće-li komentar podać

Serbska debata

nowostki LND