FC Energija Choćebuz –

Hannover 96 1:0 (1:0)

Zestawa FC Energije Choćebuz: Sebald – Rorig, Awortwie-Grant, Campulka, Guwara, Hofmann (67. Boziaris), Pelivan, Borgmann, Ciğerci, Engelhardt (77. Moustfa), Butler (67. Tattermusch)

wrota: 1:0 Tolcay Ciğerci (12.)

Přećiwo tehdyšemu druhemu zwjazkowemu ligistej 1. FC Magdeburg bě so FC Energiji Choćebuz w sezonje 2013/14 posledni króć skok do druheho pokalneho koła DFB poradźił. Bě zaso jónu na času, zo sej Choćebuz skónčnje z dobyćom komfortabelny nastupny pjenjez 423 772 eurow za druhe pokalne koło zawěsći. Tole je so chowancam Energije sobotu wječor ze snadnym wuspěchom přećiwo mustwu druheje ligi Hannover 96 poradźiło.

Při tym dóńdźe hižo do zahwizdanja k napjatosći. Při sćoplenju bě stajny wrotar Elias Bethke z nohu w trawniku wisajo wostał a sej lěwu nohu tak zrani, zo dyrbješe pod sylzami nutřkowny rum wopušćić. Tola to hosćićelow na zbožo z koncepta njepřinjese. Wote wšeho spočatka woni agresiwnje, bojownisce, zmužiće a sebjewědomje agěrowachu.