ST 1922 Radwor – FSV Módry-Běły Minakał 4:1 (1:0)

Za Radworske mustwo zasadźeni: Pěčak – B. Grubert, Wjesela, Adam, Wjeńka, Wencel, Nuk, Paška (59. Lawka), Schöne (89. Burčik), Elsner (86. M. Grubert), ­Hetaš

Gmejnski derby mjez mustwowaj ST 1922 Radwor a Módro-běłymi Minakał bě njedźelu tójšto přihladowarjow do Radworja wabił. Wot spočatka sem mějachu hosćićeljo kontrolu nad hrě. Z wěstymi hrajnymi kombinacijemi, zwjetša přez křidle, postajowachu hosćićeljo hru. Minakał třěleše nimale bjezwuwzaćnje dołhe bule doprědka a pytaše tak spěšny puć k wrotam. Spočatnje bě hra chětro bojowniska z wjele dwubojemi. Radwor pak wobchowa měr a hraješe zmužiće doprědka. W prěnjej štwórć hodźinje docpěchu zasłužene nawjedowanje. Po zamjeće bě Karl Hetaš na městnje a trjechi wrota 1:0 (16.). Intensita na městnje dale přiběraše. Přeco zaso wuhrachu krute dwuboje. W 32. min. sćěhowaše dwělomna scena. Karl Hetaš dyrbješe po dwuboju z čerwjenej kartu polo wopušćić. Tež napřećiwny hrajer dyrbješe so wuměnić. Najebać muža mjenje hraješe Radwor dale sylnje a měješe dobre móžnosće za wutwarjenje předskoka. Do połčasa pak podachu so ze snadnym 1:0.