W Miłoćicach załoža młodostni, kotřiž so za tamnišu skału Při Krabatowym kamjenju zajimuja, rozmołwne koło. Prěnje zarjadowanje rjadu Bjesadna ­kofejownja wěnuja zašłym podawkam w skale. Milenka Rječcyna je so z Johannu Cyžec wo tym rozmołwjała.

Wo čim chceće bjesadować? A wosebje: Štó bjesaduje z kim?

Na bjesadu při šalce kofeja a skibce tykanca přeprošujemy wšitkich, kotřiž su na někajke wašnje ze skału „Při Krabatowym kamjenju“ w Miłoćicach zwjazani. To móža być ludźo, kotřiž su tam dźěłali, do a tež po přewróće. Wjeselimy so na tych, kiž přinjesu fota a historiske do­kumenty sobu. Zawěsće wědźa někotři tež wo tym powědać, kak su jich nanojo a dźědojo swój čas tam dźěłali a žiwi byli. Wědźa woni wo wosebitosćach wobdźěłanja zornowca? Što je so z něhdyšimi mějićelemi stało? A kak je k załoženju towarstwa Kamjenjak dóšło? Kotre zaměry tehdy mějachu? A kotre su mjeztym zwoprawdźili? Hižo jutře popołdnju w 14 hodź. chcemy so w skale zetkać.

To budźe potajkim wólna bjesada, na kotrejž je kóždy witany, kiž so za skału a jeje přichod zajimuje?