Clemens Meyer steji jako jedyn z dweju nawodow mjeztym nimale poł lěta na čole filmoweho festiwala Nysa (NFF). Lětuše, 23. raz wuhotowane zarjadowanje wotměje so wot 26. do 30. meje. Wone je 27lětnemu takrjec z prěnim postajenjom pozicije. Bosćan Nawka je so z nim rozmołwjał.
Knježe Meyero, kak Wam hladajo na oficialny debit w nowej funkciji něhdźe njedźeli do zahajenja festiwala je?
Napjatosć přiběra a sym wězo trochu rozbudźeny. Zdobom sym wćipny a wjeselu so, runja cyłemu festiwalowemu mustwu rjec móc: Tuž chcemy raz!
Nowe wosoby wuskutkuja často změny. Byrnjež wotežki hakle krótki čas w rukomaj měł: Kelko z Wašeje strategije sće hižo zwoprawdźić zamóhł?
