Wolejbulistki prěnjeho zastupnistwa sportoweho towarstwa Viktorije Worklecy su hrajnu dobu z pokalnymaj hromaj w Žitawje wuspěšnje zahajili.

VV Žitawa 09 II – ST Viktoria 0:2 (17:25, 18:25)

Hóstne mustwo wustupowaše wote wšeho spočatka koncentrowanje, zmužiće a jako zahraty cyłk. Hižo w spočatnej hrajnej fazy Worklečanki pokazachu, zo chcedźa hru dominować. Wosebje serija nadaćow na spočatku postara so wo komfortabelny předskok. Přetorhnjenje ze stron přećiwnika při stawje 8:1 jeno mało na tym změni. Hosćo hru dale postajowachu. Ze sylnymi nadaćemi a stabilnym přiwzaćom so Worklečankam poradźi, Žitawčanki přeco zaso pod ćišć stajeć. Wosebje nadběhi přez srjedźnu a wonkownu poziciju běchu wuspěšne, tak zo sej Viktoria dalše dypki zawěsći. Přećiwnicy mějachu ćeže, za jich přihrawki a konsekwentne nadběhi dobre rozrisanje namakać. Naposledk Worklečanki prěnju sadźbu z jasnym 25:17 za sebje rozsudźichu.