18 ludźi zeznajomja so hač do 22. julija ze serbskej rěču a kulturu

Budyšin (SN/CoR). Prěnje dožiwjenja w rozšěrjacej so serbskej Łužicy wobdźělnicy lětušeho kursa za serbsku rěč a kulturu po oficialnym zahajenju minjeny pjatk hižo maja. Tak su wčera w Chrósćicach Božu mšu wopytali a so na to do Drježdźan podali, zo bychu so tam z towarstwom Stup dale zetkali a serbske wodźenje po tamnišej škleńčanej manufakturje VW dožiwili.

Dohromady 18 ludźi ze sydom krajow so na ferialnym kursu Serbskeho instituta lětsa wobdźěla, a to z Němskeje, Pólskeje, Čěskeje, Awstriskeje, Ameriki, Francoskeje a ze Słowakskeje. Mjez nimi tež potomnik wupućowarjow z Łužicy a awtor knihi „A rock against alien waves“ Charles Wukasch z Texasa.