Młodostne so z dźěćimi serbskorěčnje zaběraja

Budyšin/Rakecy (SN/MiR). Sydom młodostnych wot 16 lět je so za to rozsudźiło, na namołwu Budyskeho Rěčneho centruma WITAJ jako pomocnica w pěstowarni skutkować. „Naš poskitk wusměrja so předewšěm na wubrane dźěćace dnjowe přebywanišća wšelakich nošerjow, w kotrychž maja jednu abo dwě Witaj-skupinje z wotpowědnje mało serb- skimi kubłarkami abo kubłarjemi, štož so lěto wot lěta měnja“, rozłožuje wědomostna sobudźěłaćerka RCW Jadwiga Kaulfürstowa, „pomocnicy su zwjetša potom zasadźene, hdyž su serbske kubłarki abo kubłarjo w dowolu. Tak maja wone z dźěćimi serbsce rěčeć a so z nimi zaběrać.“ Při tym je młodostnym stajnje kubłarka poboku. RCW dźěło płaći. Zrěčenje na stajnje dwě njedźeli prózdninskeho dźěła dojedna rěčny centrum z nošerjom abo z nawodnicu wotpowědneho přebywanišća. RCW je z nošerjemi a kubłanišćemi sčasom zwisk nawjazał, zo bychu wo tym rěčeli, hač chcyli pomoc měć. Hakle na to su zjawnje za prózdninske dźěło wabili.