Kompaktny kurs delnjoserbšćiny wabi dale a wjac zajimcow
Choćebuz (SN/MiR). Lětuši kompaktny kurs delnjoserbšćiny w lětnich prózdninach je 44 zajimcow přiwabił. Tónkróć wobdźěla so na nim jako partner Šule za delnjoserbsku rěč a kulturu Choćebuz tamniše Dźěłanišćo za serbske kubłanske wuwiwanje (ABC). Wot soboty kursisća z regiona kaž z Lipjeho, Terpjoho, Drjowka, Myšyny a Choćebuza zhromadnje ze zajimcami z Berlina, Lipska, Battinsthala, Drježdźan, Mužakowa, Taucha, Podstupima, Frankfurta nad Wódru a Złokomorowskeje wokoliny rěč wuknu a sej z pomocu wulětow a přednoškow region zbližeja. Samo z Parisa maja wobdźělnika, kiž skutkuje tuchwilu njedaloko Berlina. W štyrjoch skupinach, spočatnje běchu jeno tři zaplanowali, wuknu započatkarjo runje tak kaž pokročeni. „W jednej skupinje poskićamy wosebje móžnosć konwersacije tym, kotřiž hižo poměrnje běžnje delnjoserbsce rěča“, rozłožuje nawodnica rěčneje šule Marja Elikowska-Winklerowa.