Składnostnje 100. posmjertnych narodnin Jurja Brězana wotmě so lětsa tójšto zarjadowanjow. Štož je Worklečanska wyša šula wčera organizowała, so wot nich jara přijomnje wotzběhowaše.

Worklecy (SN/MWj). Basnje, wurězki z powědančkow a dźiwadłoweje hry kaž tež hudźba bjez wulkeje techniki bě měšeńca, z kotrejž su holcy a hólcy Worklečanskeje Serbskeje wyšeje šule „Michał Hórnik“, jich wučerki a wučerjo kaž tež horstka wjesnjanow wčera na lětuše stote posmjertne narodniny Jurja Brězana spominali. Při tym so we woprawdźitym zmysle na slědy spisowaćela podachu.