Wojerecy (KD/SN). Z huslemi, pišćałkami, spěwom a dudami móžeš wulkotnje serbsku folklornu hudźbu hrać. Tole su srjedu wopytowarjo koncerta we Wojerowskim hrodźe nazhonili a z wjele přikleskom mytowali. Něhdźe sto wopytowarjow je přišło.

Čěska kapała Lidová muzika z Chrástu njezanjese jenož čěske pěsnje, ale tež delnjoserbsku a hornjoserbsku hudźbu, připowědźi županka župy „Handrj Zejler“ Gabriela Linakowa. Tak jědnaće hudźbnikow serbsku hudźbu tež w druhich kónčinach Němskeje rozšěrja. „Zahrajemy tule hudźbu, dokelž ma wona dobru kwalitu“, rjekny nawoda kapały Vojtech Kouba. Wón moderěrowaše hudźbny wječor serbsce, čěsce a němsce a připowědźi mjez druhim spěwy z albuma skupiny „Za čěskimi horami“. Skupina pěstuje hižo někotre lěta serbsku spěwnu folkloru a poby tež na Mjezynarodnym folklornym festiwalu Łužica.