Premjera dźěćaceho dźiwadła při NSLDź
Budyšin (SN/MiR). Sydom hrajerjow – sydom hłownych rólow, kotrež młodźi akterojo wuběrnje zmištrowachu. Premjera inscenacije „Zrudny princ“ Serbskeho dźěćaceho a młodźinskeho dźiwadła při Němsko-Serbskim ludowym dźiwadle přiwabi wulku syłu serbskich a němskich přihladowarjow do Budyskeho Dźiwadła na hrodźe. „Smy jara zbožowni, zo swoje dźěći a wnučki za serbske dźiwadło zahoriće a zo móžemy z tymle poskitkom dalši wobstajny serbskorěčny rum tworić“, praji do zahajenja hry zastupjerka intendanta NSLDź a zamołwita za serbske dźiwadło Madleńka Šołćic.