Wukony wučerjow maja so skónčnje připóznać

Drježdźany/Budyšin (SN/MiR). Wučerjo sakskich šulow w zjawnym nošerstwje su dźensa stawkowali. K protestam namołwjeli běchu dźěłarnistwje kubłanje a wědomosć (GEW) a ver.di kaž tež Němski zwjazk zastojnikow (dbb). Protestne akcije mějachu wšelakory raz. GEW a ver.di sćeleštej swojich ludźi direktnje před financne ministerstwo w Drježdźanach, čłonojo dbb demonstrowachu po stolicy.

Dźensniši stawk zapřiješe kubłanišća po cyłej Sakskej a tak tež serbske. Póndźelu běchu wotpowědne podłožki do šulow wšitkich družin dóšli. Na to dóstachu starši informacije z listom, kotrež su šulske nawodnistwa a wučerjo šulerjam sobu dali. Wučerjo móžachu so tež hišće na dnju stawka za wobdźělenje rozsudźić. Přiwšěm měješe wučba zaručena być.