Šulerjo z Budyšina a Jabloneca wobdźěleja so na němsko-čěskej wuměnje

Budyšin (SN/MiR). Pod Budyskej Bohatej wěžu su słyšeć serbske, němske a čěske zwuki, a to wšitke nadobo. Šulerjo w starobje dźewjeć do jědnaće lět so tam zetkaja. Woni su z partnerskeju kubłanišćow, ze Serbskeje zakładneje šule Budyšin a ze Zakładneje šule Jablonec nad Nisou w Čěskej. „Tónkróć pak njekorjeni zetkanje w našich rěčnych a kulturnych zwiskach, kotrež hižo 15 lět pěstujemy“, rozłožuje Budyska wučerka Gabriela Bajtlowa, „wobě kubłanišći wobdźělatej so na němsko-čěskej wuměnje, spěchowanej wot Europskeje unije. Zastupowaca wjednica šule na Liberecskej dróze 26 w Jablonecu nad Nisou Karolína Kopalová powěda: „Nam je tale wuměna wosebje drohotna, na jednym boku zeznawaja so naši šulerjo z domiznu dźěći našeje partnerskeje šule, a to z cyle druheho wida. Na tamnym boku móža so w mjezsobnym dorozumjenju zwučować.“ A to hólcy a holcy wužiwaja. „Ručež njemóža w swojej maćeršćinje dosć posrědkować, rěča přidatnje jendźelsce“, wona zwěsća.