Serbske šulske towarstwo zmuži so na nowy internetny poskitk

Chrósćicy/Budyšin (SN/MiR). Z nowej internetnej stronu chce Serbske šulske towarstwo klětu do zjawnosće hić. Prěnje dźěła su hižo dokónčene. Na lětušej čłonskej a wólbnej zhromadźiznje SŠT zańdźenu sobotu w Chróšćanskej Jednoće je gymnaziast a programěrar Adrian Ćěsla poskitk předstajił. Stronu namakaja zajimcy bórze pod hesłom „Dyrdomdej“ w swětadalokej syći. „Tak njezaćahnu jenož do našich pěstowarnjow a hortow, ale wšudźe, hdźež serbšćinu posrědkuja, prěni króć tež nowe medije z poskitkom našeho towarstwa“, praji předsydka SŠT Ludmila Budarjowa. „Z tym so prestiž našeje maćeršćiny jako moderna rěč, z kotrejž móžeš so wo wšěch temach rozmołwjeć, nahladnje pozběhnje.“ Wot februara, tak su plany fachoweho kubłanskeho towarstwa, ma web-strona přistupna być. Hač do toho je wona w probowej fazy a jenož małemu kruhej wobdźělenych přistupna.