Za Kita Lorenca, ale tež za Marju Grólmusec

Slepo (SN/MiR). „Mam za hódnu gestu, by-li ródna wjes runje nastawacemu nowemu Němsko-Serbskemu šulskemu centrumej Slepo spožčiła mjeno ,Kito Lorenc‘.“­ Tole piše nawoda Slepjanskeje Wyšeje šule „Dr. Marja Grólmusec“ Wolfgang Goldstein, kiž je zdobom wjesny předstejićel, w decemberskim wudaću hamtskeho łopjena zarjadniskeho zwjazka Slepo. Wuwabiło bě tónle namjet rozmyslowanje Goldsteina, kak přichodnym generacijam, kotrež na šuli kubłaja, „po­srědkować hłubši zwisk k domiznje. Sym sej wěsty, zo šulski centrum z mjenom sławneho basnika, kiž bu w Slepom rodźeny, přichodnje identifikaciju šulerjow ze wsu a regionom spěchuje.“ Hnydom pak wón dodawa, zo nima so rozmyslowanje wo nowym mjenje spřećiwjeć mjenu dr. Marja­ Grólmusec. „Naša šula nosy jeje mjeno mnohe lěta a je z njej zwjazana. Njeje pak znate, zo je wona hdy zwisk k Slepom měła. Z Kitom Lorencom by tomu cyle hinak było“, šulski nawoda wuswětla.