Sep prašenjow ministerskemu prezidentej stajili

póndźela, 07. meje 2018
artikl hódnoćić
(0 )
Sakski ministerski prezident Michael Kretschmer (CDU, naprawo) je minjeny pjatk w Kulowje ze šulerjemi wo Europskej uniji rěčał.  Foto: Gernot Menzel Sakski ministerski prezident Michael Kretschmer (CDU, naprawo) je minjeny pjatk w Kulowje ze šulerjemi wo Europskej uniji rěčał. Foto: Gernot Menzel

Kulow (SN/MiR). „W tymle městačku je začuwać wulki angažement wobydlerjow za domiznu. To pokazuje so w žiwej zhromadnosći w towarstwach kaž tež mjez generacijemi“, rjekny sakski ministerski prezident Michael Kretschmer (CDU) pjatk w Kulowje, „tuž sym bjez wulkeho wotwažowanja rady sem přijěł.“ Kretschmer bě so přizjewił jako roz­mołwny partner šulerjam tamnišeje wyšeje šule „Korla Awgust Kocor“ na projektny dźeń Europskeje unije „Europa přińdźe do šule“. Młodostni, kotřiž wu­knu w 9. lětniku kubłanišća, běchu sep prašenjow přihotowali.

Temu do cyłka zjał a šulerjam nastork dał so na prašenja zmužić, bě žurnalist Martin Klimank. Tak rozłožowaše sakski politikar, kotre móžnosće maja mło­dostni, europsku politiku wobwliwować. „Wažne je sej zakłady tworić, sej kulturu připosłuchanja přiswojić. Dyrbiće wědźeć wo swěće a wo ludźoch. Trjebaće infor­macije, nic jeno z interneta, ale tež z nowin, z rozprawnistwa, kotrež je wuwažene. Wutworće sej swójske měnjenje a zastupujće je.“ Přitomni zaběrachu so tež z temu kubłanje. Kretschmer rozłoži, zo njebudu w Sakskej přichodnje žane šule zawrjene a zo njeje zastojnistwo za wučerjow po jeho słodźe, ale trěbne. Nawoda Budyskeho stejnišća Sakskeho krajneho zarjada za šule a kubłanje Mathias Peter naspomni, kak derje je měć dobre styki do susodnych krajow. „Sakska je z wotpowědnymi běrowami w Pólskej a Čěskej republice za to dobre wuměnjenja wutworiła. „Mjezy přesahowaca syć dopomha lěpšemu skutkowanju zarjadnistwow, cyle w zmysle EU.“ Kulowski měšćanosta Markus Posch (CDU) pokaza na přećelske styki partnerskim městam a naspomni: „Wažne je, zeznać druhich ludźi a jich kulturu. Znaješ-li mentalitu druheho, zrozumiš motiwaciju krajow za abo přećiwo zajimam EU.

wozjewjene w: Kubłanje
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND