Bonus chcedźa bórze nałožować

štwórtk, 17. meje 2018
artikl hódnoćić
(0 )

Drježdźany (dpa/SN/MiR). Nowy bonus za serbskorěčnych požadarjow wo studij wučerstwa njesu dotal na sakskich uniwersitach nałožowali. Wot lěta 2017 wobkedźbuja po sakskim zakonju wo přizwolenju wysokošulskeho studija (Hochschulzulassungsgesetz) pohłubšene znajomosće serbšćiny za wšitke předmjety, nic jeno za serbšćinu. Dotal wšak su rěčne kmanosće jeničce při požadanju jako wučer serbšćiny wobkedźbowali.

Kaž naprašowanje Němskeje powě­sćoweje agentury wunjese, ma so mje­nowany zakoń na Uniwersiće Lipsk wot zymskeho semestra 2018/2019 přesadźić. Dokładne wuhotowanje tuchwilu z akademiskimi gremijemi wothłosuja. Na Techniskej uniwersiće Drježdźany ma bonus tohorunja wot spočatka přichodneho zymskeho semestra płaćić. Na Kamjeničanskej Techniskej uniwersiće kaž tež na sakskich wysokich šulach za wuměłstwo tajki bonus po informacijach sakskeho wědomostneho ministerstwa dotal njenałožuja.

Tež hdyž njebu bonus oficialnje dotal wobkedźbowany, wobroćichu so wjacori zajimcy za studij wučerstwa hižo loni na Serbske šulske towarstwo, kotrež je jim pohłubšene znajomosće serbšćiny wobkrućiło. Předsydka SŠT Ludmila Buda­rjowa zwěsća: „Dokelž njebu w zakonju zakótwjeny bonus nałožowany, smy někotrych serbskich a serbskorěčnych zajimcow za studij wučerstwa zhubili.“

Zaměr noweho rjadowanja je, ličbu wučerjow ze serbskorěčnymi znajomosćemi powjetšić.

wozjewjene w: Kubłanje
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND