RCW wuhotuje „prózdninske dny“ lětsa z ćežišćom strowe zežiwjenje
Budyšin/Radwor (SN/bn). Stajnje w zymskich kaž tež nazymskich prózdninach wuhotuje Rěčny centrum WITAJ šulerkam a šulerjam wosebity wólnočasny program. Prěni raz zarjaduje RCW wot wčerawšeho tak mjenowane „prózdninske dny“ we foyeru Radworskeje wjacezaměroweje hale „Slavia“.
„Minjene lěta běchmy přeco w Hornim Hajnku z hosćom. Ryzy praktiskich přičin dla smy so lětsa za Radwor rozsudźili, hdźež je lóšo rumnosće, je-li trjeba, spěšnišo zatepić. Naša sobudźěłaćerka Beata Nastickec skutkuje jako socialna dźěłaćerka na Serbskej wyšej šuli ‚Dr. Marja Grólmusec‘, tak zo njebě ćežko prózdninske dny na tym městnje zwoprawdźić“, powěda ze stron RCW zamołwita Franciska Zopic.