Chcedźa přidatnje serbsku rěč spěchować
Budyšin (SN/MiR). Budyšan Lucian Kaulfürst je wuwił koncept za hudźbny projekt w dźěćacych dnjowych přebywanišćach, kotrež su w nošerstwje Miłočanskeho Křesćansko-socialneho kubłanskeho skutka (CSB). Na zakładźe swojich idejow chce wón dźěćom předewšěm serbske dźěćace a ludowe spěwy nawučić a zmóžnja jim na zwukowych instrumentach hrać. „Zaměr mojeho koncepta je, hudźbne spěchowanje dźěći w pěstowarnjach podpěrać. Z terapeutiskeho wida chcu jim pokazać, kak móža swoje zajimy přesadźić a hdźe maja na druhich kedźbu dać“, hudźbny terapeut za wosebitu pedagogiku, rehabilitaciju a socialne dźěło Lucian Kaulfürst rozłožuje. Wot spočatk apryla je wón kóždu wutoru rano w Budyskej pěstowarni „Jan Radyserb-Wjela“, hdźež z dźěćimi Zmijoweje, Krabatoweje a Pumpotoweje skupiny spěwa, hudźi a hry hraje. Kompletny poskitk wotměwa so serbsce. Na to dojědźe sej do Pančic-Kukowa, hdźež dźěła z dźěćimi tamnišeje Witaj-skupiny.