Z načasnymi formami techniki a informacijemi wobchadźeć wuknyć

Budyšin (SN/MiR). Informacije w nowinach su tomu polěkowali, zo běchu městna w prěnimaj medijowymaj dźěłarničkomaj „Android Smart-Phones & Tablet“ pola Sakskeho wupruwowanskeho a wukubłanskeho kanala (SAEK) Budyšin spěšnje wuknihowane. „Poskitk měri so předewšěm na seniorow. Njejsmy pak přizjewjenje na někajku starobnu skupinu wobmjezowali“, rjekny nawoda SAEK Michał Cyž. Prěnjej dźěłarničce zahaja přichodny tydźeń. Kursaj wotmějetej so po třoch póndźelach a štwórtkach. Zajimcy móža so do swěta načasnych komunikaciskich srědkow, tableta­ kaž tež smartphona a wobchada z načasnymi komunikaciskimi srědkami zanurić. Referent posrědkuje wobdźělnicam a wobdźělnikam, mjez kotrymiž su tež Serbja, dopołdnja resp. popołdnju po třoch hodźinach trěbnu wědu. Nazběrane informacije móža wobdźělnicy hnydom w praksy wuspytać.