Budyšin (SN/MiR). Serbski gymnazij Budy­šin přeproša lětsa prěni króć cyle wědomje wšitkich šulerjow 3. a 4. lětnika serbskich zakładnych šulow z wosebitym poskitkom na dźeń wotewrjenych duri 19. nowembra. Za nich započnje so tón dźeń na gymnaziju hižo připołdnju. Šu­le­rjo přijědu z busami, kotrež je gym­nazij skazał, do Budyšina. Přihotowali su tež­ wosebity program z wuknjacymi tuchwil­neho 5. a 11. lětnika. Popołdnju budźe gymnazij runje tak kaž Serbska wyša šula přistupna staršim, dźěćom, młodostnym, wučerjam z druhich kubłanišćow a dalšim zajimcam.

„Přičina, zo zakładnych šulerjow k nam přeprosymy, je, zo chcemy za sebje jako jenički serbski gymnazij wabić a wo sebi přeswědčić“, rozłožuje nawoda gymnazija na Serbskim šulskim a zet­kawanskim centrumje René Wjacławk. „Mnozy starši so rozsudźeja słać swoje dźěćo po wuchodźenju zakładneje šule na dale wjeduce kubłanišćo, a to často na gymnazij druhdźe, na přikład w Kamjencu abo Wojerecach, nic pak na naš. Jenož na Serbskim gymnaziju pak móža dźěći swoje kmanosće w serbskej rěči opti­malnje wuwiwać.“