Wuwučowanje po koncepciji 2plus je zwjazane tež z teamteachingom (TT), to rěka wuwučowanjom z dwěmaj wučerjomaj w hodźinje. Pedagogaj Worklečanskeje Serbskeje wyšeje šule „Michał Hórnik“ Diana Šołćina a Beno Hojer předstajištaj swoje postupowanje na dźěłarničce fachoweho dnja 2plus.
Chrósćicy (SN/MiR). Teamteaching njeje samozrozumliwy na serbskich a serbšćinu wuwučowacych šulach, byrnjež w koncepciji 2plus zakótwjeny był. Skerje wotwisuje wot toho, hač ma šulske kubłanišćo dosć wučerjow, zo by metodu zaručić móhła. Tak ma sej kóžde lěto znowa w Budyskej regionalnej wotnožce Krajneho zarjada za šulu a kubłanje (LaSuB) wotpowědne wučbne hodźiny wobkrućić dać. „Serbske šule su něšto wosebite. Dyrbimy tuž na swojich prawach wobstać. Nimamy so w tym padźe němskim šulam přiměrić“, rjekny Diana Šołćina, kotraž podawa we Worklecach towaršnowědu, stawizny, sport a hudźbu.
