Zakłady za masterski plan za wozrodźenje delnjoserbšćiny zwěsćili

Choćebuz (SN/MiR). Delnja Łužica zaběra so hižo wjacore lěta pod hesłom „Jo, za tebje 2.0“ z perspektiwu delnjoserb­šćiny. Tak chcedźa zdźěłać masterski plan, wo kotryž so předewšěm serbska akciska syć stara. Zapřijate su do njeje serbske institucije a towarstwa, braniborskej minis­terstwje za wědomosć, slědźenje a kulturu (MWFK) kaž tež za kubłanje, młodźinu a sport (MBJS). Na swojim njedawnym zeńdźenju su čłonojo syće zwěsćili, zo přińdu za zdźěłanje masterskeho plana aktiwity wosebje z kruhow, kotrež njejsu institucionelnje na serbske temy wjazane. „Na tamnym boku su wjacore institucije, kotrež su dźěl syće wědźeć dali, zo nimaja kapacity, masterski plan zestajeć, byrnjež za wozrodźenje delnjoserbšćiny trěbny był“, rozłožuje referent krajneje społnomócnjeneje za naležnosće Serbow w MWFK a koordinator serbskeje akciskeje syće Měto Nowak. W meji bě syć zjawnje namołwjała, zdźěłać plan „Ducy do přichoda“.