Studija wo kubłanju dawa nadawki za wuwiće wuknjenja a wuwučowanja
Drježdźany/Budyšin (SN/MiR). Porno lětu 2016 njeje runje wušła Pisa-studija wusměrjena na wukony jednotliwych zwjazkowych krajow w Němskej. Loni zwěsćichu dokonjanosće 15lětnych šulerjow po cyłym swěće we wobłukach čitanje, pisanje, matematika a přirodowěda.
Na naprašowanje w regionalnej wotnožce Sakskeho Krajneho zarjada za šulu a kubłanje (LaSuB) zdźěli jeje rěčnik dr. Jens Drummer: „Po cyłej Němskej bě na loni wotmětym tesće a nětko wozjewjenej Pisa-studiji 5 500 šulerjow wobdźělenych. W Sakskej běchu šulerjow z dźewjeć wyšich šulow a gymnazijow za přepruwowanje wuzwolili.“ Kotre to běchu a hač běchu mjez nimi serbske abo serbšćinu wuwučowace, zarjad zdźělić njemóže. Šule běchu po standardizowanym připadnym principje wuzwolene. Zamołwity za to je Centrum za mjezynarodne přirunowanske kubłanske studije (ZIB) Techniskeje uniwersity Mnichow, kotryž studiju za Němsku koordinuje. „Dopóznaća wo stawje wukonow za serbšćinu rěčacych šulerjow so z njeje zwěsćić njehodźa“, dr. Drummer rozjasni.