Dźěći na mnohich městnach ptačokwasne programy pokazali
Budyšin (SN/BŠe). Po cyłej Łužicy předstajeja dźěći tele dny ptačokwasne programy, kotrež běchu minjene tydźenje pilnje nazwučowali. Hižo štwórtk su hortowe dźěći Slepjanskeje pěstowarnje „Pfiffikus“ kwasowali. Witaj-skupina chowancow AWO-pěstowarnje Budyskeje Strowotneje studnje dojědźe sej pjatk dopołdnja do hladarnje starych „Sonnenhof“ na Tuchorskej, hdźež su so wobydlerjo jara nad jich wopytom a ptačokwasnym programom wjeselili.
Radworski dźěćacy dom „Alojs Andricki“ je pjatk prěni raz ptači kwas w hosćencu „Meja“ pokazał. Tam maja jewišćo a wjele městna za přihladowarjow, kotřiž běchu we wulkej ličbje přitomni. Nimo staršich, dźědow a wowkow a zdźěla tež kmótow dźěći su tež wuměnkarjo wosady přišli a sej spodobny program lubić dali. Na čole ćaha steješe lětsa braška Quentin Kral, kiž witaše hosći w mjenje njewjesty Milenki Eiseltec a nawoženje Janeka Měrćinka.