Ralbicy (SN/MiR). Na serbskimaj wyšimaj šulomaj Worklecy a Ralbicy chcedźa w nowym šulskim lěće 2020/2021 wutworić stajnje dwě rjadowni w 5. lětniku. Zo by so to radźiło, su argumenty trěbne. Wšako nimatej wobě šuli dotal dosć přizjewjenjow za přate cyłkownje štyri rjadownje. „Nam je wažne zawěsćić, zo móža wšitcy šulerjo, kotřiž tuchwilu hišće do našeju zakładneju šulow chodźa, a tež dalši, kotřiž su so za wyšu šulu we Worklecach abo Ralbicach přizjewili, po wuchodźenju zakładneje šule tež tam na dale wjeducym kubłanišću dale wuknyć“, rjekny Ralbičansko-Róžeńčanski wjesnjanosta Hubertus Ryćer (CDU).
Tak přewjedźechu na Ralbičanskej wyšej šuli zańdźeny pjatk diskusiju wo perspektiwach za zajimcow, kotřiž chcedźa wot noweho šulskeho lěta tam kaž tež we Worklecach w 5. lětniku wuknyć. Prěni naćisk za rjadowanje mjeztym předleži, kaž rěčnik Sakskeho krajneho zarjada za šulu a kubłanje (LaSuB) dr. Jens Drummer na naprašowanje Serbskich Nowin wobkrući. Wo nadrobnosćach pak dotal w zjawnosći ničo znate njeje. Wšako dyrbja naćisk dale rozjimać.
