Kóžde lěto znowa su wočakowanja na Serbski ludowy ansambl wulke. Wosebje hdyž spočatk januara rěka, zo hotuje so serbske profesionelne wuměłske ćěleso na ptači kwas.
Budyšin (SN/MiR). Tež lětsa tomu wospjet tak běše. Wšako slědowaše po lońšej inscenaciji za dźěći „Kak je hawron ptači kwas zaspał“ nowa produkcija, na lońšu wobsahowje nawjazowaca, „Zabyty ptači kwas“. Loni kaž tež lětsa běch wopytowarka předstajenja w Budyskim Němsko-Serbskim ludowym dźiwadle. Tak kaž loni běch tež lětsa znowa zadźiwana. W běhu předstajenja bě lědma serbske słowo słyšeć. Loni zhonich na swoje prašenje přičinu, zo bě zarjadowanje knihowane ze stron krajnoradneho zarjadowanja. Na tele předstajenje přišli běchu nimo němskich tež šulerjo ze serbšćinu podawacych šulow kaž tež chowancy zarjadnišćow w Budyskim wokrjesu, w kotrychž staraja so fachowcy wo zbrašene dźěći, młodostnych a dorosćenych. Zrozumliwe tuž, zo ansamblowcy swój program, hač na jedyn spěw a serbskorěčny postrow němsce předstajachu.