Wodowe Hendrichecy (SN/lmc/hš). Na lětušim rěčnym a prózdninskim lěhwje Serbskeho šulskeho towarstwa we Wo­dowych Hendrichecach wobdźěla so 22 holcow a 22 hólcow 4. do 9. lětnika kaž tež štyrjo kubłarjo.

Ale kak korona rěčne lěhwo wobwliwuje? Kotre škitne naprawy maja tam dodźeržeć, a pojědu tež studenća zaso sobu do rěčneho lěhwa? Marlis Młyn­ko­wa, koordinatorka SŠT, móže na to wot­mołwić. Najwažniše za wobdźělnikow je pod­pisane wobkrućenje staršeju, zo su strowi. Bus wotjědźe pjatk, 21. awgusta, w 9 hodź. při Chróšćanskej šuli, pojědźe dale do Radworja a budźe potom něhdźe w 11 hodź. we Wodowych Hendrichecach.

We wočerstwjenišću za dźěći, młodostnych a swójby kaž tež zajimowane skupiny, KieZ Querxenland, trjebaja šulerjo škitny nahubnik a dyrbja wěstotny wotstawk dodźeržeć. Tež wosebite po­stajenja maja woni wobkedźbować, kaž na přikład jednosměrki na šćežkach. Nimo­ toho smědźa jeno dźesaćo w rjenje wuhotowanej jědźerni přebywać, a to tež jenož wěsty čas.