Korona wutrobnemu witanju šulskich nowačkow njezadźěwała
Budyšin (SN/MiR/JaW). Nowe šulske lěto je zahajene. Byrnjež přiwzaće lětsa korony dla hinaše było hač zwučene, su na wšitkich kubłanišćach šulskich nowačkow wutrobnje witali.
Na Worklečanskej zakładnej šuli „Michał Hórnik“ witaše direktorka Sabina Hejdušcyna 34 abejcejnikow dweju rjadownjow w sportowej hali. „Sym dźěćom a staršim sobu na puć dała, kak wažne je měć dowěru do nas wučerjow, zo tójšto zamóžemy.“ Šulerjo 2. lětnika su kulturny program předstajili.
Na Budyskej Serbskej zakładnej šuli je amtěrowaca nawodnica Andrea Rätzowa 53 nowačkow na šulskim dworje wotpowědnje hygieniskim předpisam witała. Wězo dóstachu tež w sprjewinym měsće nowačcy cokorowe tity, kotrež jim palčiki z awta wohnjoweje wobory nošachu.