Budyšin (SN/MiR). Budyscy starši paruja serbskorěčne rumy za swoje dźěći a to na maćernorěčnym niwowje. Projektowa managerka Domowiny Rejzka Krügerowa zarjaduje tuž přichodnu wutoru prěni króć Serbsku hodźinku w sprjewinym měsće. „Starši, kotrychž dźěći chodźa na Budysku Serbsku zakładnu šulu, wočakuja a sej přeja, zo my ze stron Domowiny wuwiće maćernorěčnych kmanosćow jich dźěći podpěrujemy“, tak wona rozjasnja. „Tohodla smy hižo dlěje wo tym rozmyslowali, kak móhli přeću wotpowědować.“ Hladajo na to, zo je runje na Budyskej serbskej šuli w rjadownjach wobstajnje wjele wot doma němskorěčnych dźěći, su serbscy starši za idejemi pytali, kak swojim dźěćom zmóžnić druhdźe hač doma serbskorěčnu atmosferu dožiwić, a su so na managerku wobroćili. Mjeztym su so wšelake Budyske serbske gremije z tematiku zaběrali. Zaměr bě mjez druhim, namakać ideje a wo jich přesadźenju rěčeć, na přikład na zetkanju serbskich staršich w Budyskej barje Sundowner.