Chcyli wuwučowanske a wuknjenske srědki tež digitalizować
Budyšin (SN/MiR). Tež lětsa awtorojo, kotřiž wučbnicy a wučbne materialije za šulerjow a wučerjow wuwiwaja, zaměrnje na swojich produktach dźěłaja. „To nastupa wuwučowanski a wuknjenski material za serbšćinu runje tak kaž za fachowe předmjety“, praji wotrjadnica za rěčne wuwiwanje a pedagogiku w Rěčnym centrumje WITAJ Annett Dźědźikowa. Schwalenska komisija je so na to dojednała, zo ma lětsa 31 wučbnicow a wučbnych srědkow wuńć, a to za potrjebu na šulach w Hornjej a Delnjej Łužicy. Srědki zdźěłaja sobudźěłaćerjo a sobudźěłaćerki RCW zhromadnje z awtorami a awtorkami, LND je na kóncu wuda. Při tym je často tak, zo w běhu lěta dalše materialije k tomu přińdu.