W Sakskej wuknu wšitcy zakładni šulerjo zaso na swojej šuli
Pančicy-Kukow/Radwor (SN/MiR). Jenož hišće tři nocy, potom započnje so za wšitke dźěći, kotrež chodźa w Sakskej do zakładneje šule zaso wšědny dźeń, a to z wuknjenjom na kubłanišćach. Hač do srjedź tohole tydźenja njeběchu šulscy nawodźa hišće wědźeli, hač změja so zaso na prezencnu wučbu nastajić. Mjeztym je jasne, zo póńdu w Sakskej, w prěnim zwjazkowym kraju po cyłej Němskej, zakładni šulerjo zaso do šule. Tole bě knježerstwo wutoru rozsudźiło.
Na Chróšćanskej zakładnej šuli „Jurij Chěžka“ njeje ćežko spěšnje na nowe postajenja reagować. Nawoda kubłanišća Měrko Šmit rjekny: „Husto smy hakle pjatk abo sobotu ze stron sakskeho statneho ministerstwa za kultus a jeho podrjadowanych zarjadnišćow konkretne naprawy dóstali, kak mamy postupować. Za nas pak njeje ćežko rjadownje wot sebje tak wotdźělić, zo njenastanu njetrjebawše kontakty. Wšako smy to hižo loni w nalěću praktikowali. Wo dźělenju rjadownjow do skupinow, kotrež tydźensce wotměnjejo na zakładnych šulach wuknu dotal hišće słyšał njejsym.“
