Kulowskej kubłanišći do kooperaciskeho zwjazka Wojerecy zapřijatej

Kulow (AK/SN). Wšitke měšćanske kaž tež gmejnske rady Budyskeho wokrjesa maja so tuchwilu z naćiskom plana šulskeje syće zaběrać. Tak tohorunja w Ku­lowje, hdźež maja Krabatowu zakładnu šulu a Wyšu šulu „Korla Awgust Kocor“. Wobě stej w nošerstwje města Kulowa. Kaž z planowanja wokrjesa wuchadźa, stej kubłanišći tež přichodne lěta kruće do njeho zapřijatej, to rěka zawěsćenej. „Dołhodobne wobstaće je dobra powěsć“, měni Kulowski měšćanosta Markus Posch (CDU). „Před lětami njebě hišće wšitko tak wě­ste. Nětko je w naležnosći našeju šulow měr zaćahnył.“ Hižo w meji ma Budyski wo­krjesny sejmik wo dokumenće wothłosować. Do toho pak kulturny a kubłanski kaž tež wokrjesny wuběrk wo planje hišće wuradźujetej. Kulowska měšćanska rada je na swojim njedawnym posedźenju naćiskej jednohłósnje přihłosowała.