Akterojo w Pančicach-Kukowje a Kulowje smědźa so wjeselić
Pančicy-Kukow/Biskopicy (SN/MiR). Dobyćerjo prěnjeho wubědźowanja za angažement młodźiny Biskopičanskeje syće za dźěći a młodźinu (KiJu) za Budyski wokrjes su wuzwoleni. „Poměrnje spěšnje je so jury rozsudźiła mytować młodźinski klub w Pančicach-Kukowje“, měni Bernadette Zellerowa z regionalneho teama Zapadna Łužica. „Jurorow je přeswědčiło, kak so młodostni tam zasadźeja, zo bychu serbske a němske žiwjenje hromadu wjedli.“ Zo słušeja tohorunja Kulowscy skawća do kruha mytowanych, je wjesnjanka nastorčiła, dokelž bě skupinu dźěći a młodostnych namjetowała. „Wona potwjerdźa wosebje hódnoty, kotrež tam čłonam skawtskeje skupiny posrědkuja, kaž sprawnosć a spušćomnosć.“