W Schmiedebergu rosće zajim dźěći a młodostnych za druheho

Schmiedeberg (SN/MiR). „Swěčka, swěć nam w ćěmnym času“ klinči z ertow dźěći, kotrež wot wutory pilnje za musical „Z TOBU – Bohu swjećene lěto“ zwučuja. Serbski komponist Měrćin Weclich sedźi za křidłom a podawa prěnje zwuki tutoho a dalšich spěwow. „Wotmysł projekta je zhromadnosć mjez sobuskutkowacymi tworić. Jedne ćěleso je naš chór, w kotrymž spěwamy z jednym hłosom“, wón wuswětla, „to rěka, zo nimamy hłósne skupiny.“ Na předstajenjach potom budźe wo wjele wjace hłosow, hdyž chór publikum sobu zapřija.