Zakopane (SN/MiR). Serbske šulske towarstwo (SŠT) a Towarstwo Cyrila a Metoda (TCM) stej zhromadnje přihoto­wałoj rěčne lěhwo w Pólskej. 45 mło­dostnych w starobje 14 do 18 lět wužiwa tuchwilu móžnosć so w Zakopanach aktiwnje wočerstwić. „Smy loni dlěje wo tym rozmyslowali, hač měli za staršich zajimcow našeho towarstwa druhdźe hač po zwučenym wašnju we Wodowych Hendrichecach poskićeć přiměrjene rěčne lěhwo“, zwuraznja Roman Grzyb. Čłon předsydstwa SŠT, wučer za etiku a geografiju na Budyskim Serbskim gymnaziju, nawjeduje skupinu młodych dowolnikow a jich přewodnikow w Zakopanach. Nimo njeho staraja so wo młodostnych wučer Damian Bogusz kaž tež studentce wučerstwa Michaela Młynkec a Marie-Luise Matješkec.