Wučbny plan kaza sej wužiwać digitalne medije na zakładnych šulach

Pančicy-Kukow/Radwor/Slepo (SN/MiR). Digitalny swět je do šulow zaćahnył. Wučbny plan za zakładne šule sej to jasnje žada. Wot 1. lětnika hižo spjelnja šulerjo na Šuli Ćišinskeho w Pančicach-Kukowje nadawki w jednotliwych předmjetach, předewšěm we wobłuku spěchowanja. „Wuwučowacy wučer skedźbnja šulerjow na strachi, kotrež při wužiwanju digitalnych medijow hroža“, rozjasnja šulska nawodnica Jadwiga Čižankowa, „to stawa so předewšěm wot 3. lětnika. Wšako zaběraja so šulerjo potom z rešeršowanjom w syći.“ Zo bychu wědu wo digitalnym swěće šulerkam a šulerjam dale a lěpje posrědkowali, maja předwidźane w nowym šulskim lěće medijowy projektny dźeń z Michałom Cyžom přewjesć. Dalše tajke ćežišćo budźe sensibilizować staršich kaž tež wučerjow dalekubłać. Za to wužiwać chcedźa lětuši pedagogiski dźeń 2022. Zdobom podpěruje wuwučowacych wučer z kolegija, kotryž ma wobšěrne znajomosće z digitalnymi srědkami. Wobmyslenjow, zo hroža dźěćom strachi ze syće, je skerje mało.