„Seife“ woła a dźěći jědu na dožiwjenjowpołny dźesaćdnjowy přebytk

Wodowe Hendrichecy (SN/MiR). Nimo kruha znatych kubłarjow a kubłarkow rěčneho lěhwa Serbskeho šulskeho towarstwa su sej lětsa tež nowačcy do „Querxenlanda“ dojěli. Prěni króć pódla su Liza Hickec, Rafaela Domaškec, Jadwiga Ošikowa, Franciskus Wornar a Maksimilian Gruber. Wšitkim je wažne być dźěćom poboku, jeli pomoc a podpěru trjebaja. Dźěći wuknu na serbskich zakładnych a wyšich šulach kaž tež na Budyskim Serbskim gymnaziju. „Wosebje wjele šulerjow je z Radworskeje zakładneje a wyšeje šule sobu jěło“, zwěsći nawodnica lěhwa a koordinatorka SŠT Marlis Młynkowa. „Ličba zajimcow z Radworja je so w zašłych lětach wobstajnje zwyšiła. Jich je jich 19.“