Po twarskim času dweju lět bu nowy Kamjenski gymnazij wčera woswjećeny. Tysacy wćipnych dźeń wužiwachu, zo bychu raz za fasadu pohladali.
Kamjenc (IF/SN). Nowy gymnazij Gottholda Ephraima Lessinga w Kamjencu bu wčera poswjećeny. Tójšto zajimcow je přichwatało, bywši wuknjacy Lessingoweje šule runje tak kaž přichodni. K tomu wobydlerjo, wučerjo, měšćanscy radźićeljo a spěchowanske towarstwa, nošerjo rozsudow. Wćipnosć na nastaty šulski campus je jich zjednoćiła, a předewšěm hordosć na wosrjedź města dokónčeny nowotwar.
Wjace hač tysac hosći běše hižo k přitřihanju banćika připołdnju w dwěmaj na šulskim dworje. Dalši pozdźišo přichwatachu, woni rozhladowachu so w rumnosćach, kotrež běchu za zjawnosć přistupne. W poslednim prózdninskim tydźenju maja hišće małe zbytne dźěła wobstarać, tuž někotre durje zawrjene wostachu.