Brazilska steji po suwerenym dobyću 4:1 přećiwo Južnej Koreji w štwórćfinalu WM w Katarje. Bě to wot wšeho spočatka demonstracija mocy Brazilčanow. Južnoameričenjo nawjedowachu hnydom ze swojim prěnim pospytom. Raphinha přesadźi so na prawej stronje, přinjese bul nisko a wótrje do šěsnatki. Neymar jón hišće skomdźi, ale Vinícius Júnior bě na městnje (7.). Brazilska hraješe dale z wjele wjeselom doprědka, Kim Young-Gwon přińdźe w šěsnatce přećiwo Richarlisonej přepozdźe. Jědnatku přetwori Neymar (13.). Hra bě rozsudźena, prjedy hač bě so prawje započała. Richarlison (29.) a Lucas Paquetá (36.) postaraštaj so wo połčasny staw 4:0. Čestne wrota poradźichu so něhdyšemu hrajerjej SV Darmstadta Paikej Seung-Ho, kiž z distancy trjechi (76.). Přećiwnik za štwórćfinale je so w hrě mjez Japanskej a Chorwatskej wuhrał. W tutej partiji słušeše prěnja połojca Japanjanam. Najprjedy misny Shogo Taniguchi z hłójčkowanym bulom wrota. Potom skomdźištaj Daizen Maeda a Yuto Nagatomo dobru flanku. Najlěpšu móžnosć za Chorwatsku wuwostaji Ivan Perišić. Ćišć Japanjanow pak měješe so hišće w prěnjej połojcy wupłaćić.